السلام عليكم ورحمة الله وبركاته
كابتن هاني العجيزي واحد من امهر اللاعبين في مصر حاليا وأكثرهم أدبا وخلقا
ثار حوله الجدل مؤخرا كالعاده علي أي نجم يتصارع حوله القطبان الاهلي والزمالك ولكنه حسم اختياره باللعب برغم كونه نشا وتربي بنادي الزمالك
وكان لنا هذا الحديث معه
كابتن هاني أخبارك إيه؟
الحمد لله بتمرن دلوقتي مع البلدية والأمور عال العال.
ممكن تكلمنا عن بدايتك الكرويه؟
بدايتي الكرويه كانت في مركز شباب فارسكور نادي درجه ثانيه لعبت له موسمين ورحت منتخب مصر للناشئين منه وهناك شافوني الاهلي والزمالك بس انا رحت الزمالك لانه عرضه كان اكتر جديه ايامها من الاهلي وطبعا لعبت بصفوف ناشئي الزمالك واخدت هداف النادي في عدة اعوام واتصعدت للفريق الاول بالنادي ولكن لم يحالفني التوفيق.
ايه قصة انضمامك للاهلي؟
بعد مباراة البلديه مع الالومنيوم كابتن تامر النحاس وكيل اعمالي كلمني وقالي شد حيلك الناس بتوع الاهلي متابعينك وان شاء الله تروح الاهلي في يناير
طبعا الكلام دا اسعدني جدا وزاد من تالقي وبعد مباراة الاتحاد مباشرة النادي الاهلي بعت فاكس للحاج محمود الشامي والراجل الصراحه سالني قلت له انا عايز العب في
الاهلي وتم الموضوع والحمد لله.
هل تشعر ان الانضمام للاهلى تشريف لهانى العجيزى ام عبء ثقيل
يحتاج لمجهود عالى منك لاثبات نفسك " خصوصا وسط لاعيبين على مستوى عالى فى الاهلى فى نفس مركزك ؟
طبعا انا عارف اني رايح اكبر نادي في افريقيا ونادي القرن ومقدر طبعا المسؤوليه دي وعارف طبعات الفرق بينه وبين أي نادي في مصر وان شاءالله اكون علي اد
المسؤوليه دي واسعد جمهور النادي الاهلي.
ما هو رأى عائلتك فى الانضمام للاهلى وهل هناك من اقاربك متعصبون لعدم انتقالك للاهلى ؟
الصراحه معظمهم كلهم اهلاويه ان ماكنش كلهم وشجعوني علي الخطوه دي حتي والدي الزملكاوي بعد الي حصل من الزمالك هوا كمان شجعني اني اروح الاهلي
بشده.
من بدء المفاوضات اولا معك الاهلى ام الزمالك ؟ ولماذا فضلت الاهلي؟
الي بدا المفاوضات اولا الزمالك عقب ماتش المقاولين مباشرة كلمني الاستاذ عمرو الجنايني وقالي انت ان شاءالله ترجع الزمالك في يناير وساعتها رحبت انما لما
الاهلي يدخل الموضوع وافقت علي الفور.
هل ترى انك ستاخد فرصتك فى الاهلى ؟وهل هاتتقبل موضوع جلوسك علي الدكه؟
ان شاءالله انا هاعمل الي عليا وكله بتاع ربنا طبعا وموضوع الجلوس احتياطيا موضوع عادي جدا لان دي وجهة نظر مدرب وكلنا شفنا ابو تريكه بيعد احتياطي لزيدان
من غير ما تقلل منه في حاجه.
كل من تعاقد معهم الاهلى من ابناء أو لاعبى قدامى من نادى "الزمالك "
* كثير منهم اثبتوا فشلهم الذريع
* ومنهم من لم يقدم المرجو منه
فهل رواد تفكيرك هذا التسأل"أن تكون نسخه كربونيه لــ أحد هاتين الصورتين السابقتين"؟
لا طبعا لم يخطر ببالي انا لسه صغير عندي 23 سنه وان شاءالله مش هاقصر في حاجه وان شاء الله اقدر اعمل حاجه ارضي بيها جمهور الأهلي.
تكلمت كثيرا بأن الزمالك استغنى عنك بطريقة سيئه أو ما شابه
ونعلم كلنا "بأنك واربعة ناشئين من الزمالك تم عرضهم على " هنرى مشيل "
فلم يقتنع الا بــ "محمد ابراهيم "
وطلب الاستغناء عن الباقى أو اعارتهم
لماذا لم يقتنع مشيل بك " برأيك "؟
انا بالنسبه لي مكنتش ملتزم بمواعيد التدريب لان كان عندي ظروف خاصه بالتجنيد وكنت لازم اروح كل فتره والراجل فوجئ بيا لعيب في نادي الزمالك كنت بروح مرتين او تلاته في الشهر وطبعا للاسف مكنش يعرف بموضوع التجنيد ده ولما سالته قالي انت لعيب كويس جدا بس مش ملتزم معرفش انا مش ملتزم بايه بس طبعا دا مش ذنبه لان الناس ما ما عرفهوش بظروفي مش اكتر.
ذكر سابقا "حلمى طولان" بأنه عندما كان مدرب للمصرى البورسعيدى
بأنك تقدمت للعب بالنادى
فقام بالسؤال عنك داخل نادى الزمالك من خلال مدربي الناشئين
قالوا عنك بأنك لاعب غير ملتزم "بمواعيدالتدريب وغيرها "
فما ردك على هذا الكلام؟
كلام غير صحيح نفس ما ذكرته سابقا الموضوع كان خاص بالتجنيد وهما طبعا قالوكده عشان لو حد سأل هاني مشي ليه يبقي عشان مش ملتزم مش اكتر انما ممكن أي حد يسال عليا الكابتن مجدي شلبي والكابتن الجوهري الصغير وشوفو هما هايقولو ايه والحمد لله كلهم بيحبو العجيزي جدا.
ليه ما اقترحتش علي ادارة البلديه انها تاخد ماندو او الويشي اعاره وتيجي انت الاهلي بنفس المقابل المادي؟
الصراحة انا كلمت الحاج محمود الشامي في الموضوع اكتر من مره واقترحت عليه الاقتراح ده بس هوا رافض ياخد اي لاعب مكاني وخصوصا بعد تمسك المدير الفني
بيا وبشده والمهم عندي اني انتقلت للاهلي وان شاءا لله الفترة الجاية دي هابذل قصاري جهدي مع البلديه عشان يفضلو في الدوري واروح ان شاء الله جاهز للاهلي.
هل تمتلك روح الفانله الحمراء؟
طبعا
انا عايز اعمل كل حاجه في الاهلي وان شا ءالله اعمل اسم هاني العجيزي في الاهلي.
اي المراكز تفضل ان تلعب؟؟
ممكن العب فرود او صانع العاب بنفس الاجاده انا اصلا صانع العاب بس الكابتن محمد حلمي كان بيلعبني صانع العاب وان شاءالله في أي مكان اثبت نفسي.
طموحاتك ايه مع النادي الاهلي
ان شاءالله ناخد أي بطولات نشارك بها كما هي عادة الاهلي من دوري وكاس وبطولة افريقيا لنعود للعالميه باللعب بكاس العالم للانديه.
لو جالك عقد احتراف بعد فتره قصيره من لعبك للاهلي خصوصا ان الاهلي محتاجلك الفتره القادمه هاتعمل ايه؟
انا مبفكرش في حاجه دلوقتي اكتر من اني اعمل حاجه للنادي الاهلي ولو جالي عرض هاعرضه علي مجلس الاداره الاول وهما ليهم حرية التصرف وانا تحت امرهم
في أي حاجه وعموما مافيش لاعب ما يتمناش يحترف بس ان شا ءالله بعد ما اعمل حاجه لجمهور الاهلي.
اكثر لاعب ستحزن لرحيله من الاهلي؟
محمد ابو تريكه.
احلي هدف احرزته؟
الهدف الثاني في الاتحاد.
مين تحب تلعب جنبه في الاهلي
متعب وطبعا ابوتريكه.
احسن مدرب اتدربت علي ايده؟
كابتن محمد حلمي كان له الفضل بعد ربنا في عمل هاني العجيزي.
من تكن له التقدير علي الساحه الرياضيه؟
الحاج محمود الشامي الصراحه وقف جنبي في محنتي لحد لما وقفت علي رجلي وعمري ما هانساله الموقف دا ابدا.
سؤال طريف بيقول ليه بترفع الشورت من اليسار لاعلي؟
والله دي حصلت مرة واحده في ماتش المقاولين كان عندي جلطه في فخدي ورفعت الشورت غصب عني.
من لاعبك المفضل محليا وعالميا؟
محليا كابتن حسام حسن عالميا كريستيانو رونالدو.
هل كنت تتمني الانضمام للمنتخب ؟
طبعا دا شرف ليا والكابتن حسن شحاته كلم المسؤولين في البلديه بس جت اصابة مباراة الجيش ابعدتني عن المنتخب عموما دا نصيب وان شاءالله انضم في الفترات
المقبله .
في رسالة من جمهور الاهلي لازم ابلغهالك
اعطي تجد المقابل والاهلي لاينسي المخلصين وناس كتير شايفه انك ممكن تبقي خليفة الخطيب فياريت تحافظ علي نفسك
هاني احنا جمهور بيعشق فريقه قبل اي حد
واحنا الجمهورالوحيد في مصر الي مصلحه فريقه قبل اي حاجه
اجتهد علشان ربنا يديك على قد اجتهادك
النجم عندنا هو المخلص المجتهد والذي يرفع مبدا الاهلي فوق الجميع على مصلحه اي حد
الالتزام الاخلاقي والديني الي احنا ملاحظينه عليك جميل
ربنا يزيدك بس لازم تحافظ عليه لان ده اساس النجاح
ياريت بعد التمرين تاخد ساعه او ساعتين تدرب على مهارات خاصه والتسديد
الحصول على الفرصه في الاهلي صعب فياريت تتمسك بيها وتثبت جداره
وكل الامنيات الطيبه لك بالتوفيق ومنتظرينك في اكبر نادي في افريقيا والشرق الاوسط
طبعا انا سعيد بالكلام ده وبقولهم ان شا ءالله هاحاول ابذل اقصي جهد عندي عشان عليا عبء اني رايح النادي الاهلي ولازم ان شاءالله اثبت نفسي في النادي الاهلي وفي كلام طبعا اني هاني رايح عشان يعد علي دكة البدلاء او مش هايلعب بس ان شاء الله هابذل كل جهدي عشان الناس الجميله دي
موضوع: حوار جرى مع نجم الاهلى القادم هانى العجيزى